ភ្នំពេញ: ព្រះមហាក្សត្របញ្ចប់មុខតំណែងលោក វេង សាខុន ពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទហើយនៅល្ងាចថ្ងៃសៅរ៍ ទី៨ ខែតុលា ឆ្នាំ២០២២នេះ។ ព្រះរាជក្រឹត្យត្រូវបានធ្វើឡើងបន្ទាប់ពីព្រះមហាក្សត្របានទ្រង់យល់សេចក្ដីក្រាបបង្គំទូលថ្វាយរបស់នាយករដ្ឋមន្ត្រីកម្ពុជា សម្តេចតេជោ ហ៊ុន សែន។

លោក វេង សាខុន ត្រូវបានបញ្ចប់ដំណែង ខណៈពេលលោកកំពុងបេសកកម្មការងារនៅអឺរ៉ុបមួយសប្តាហ៍ ពាក់ព័ន្ធទៅនឹងការពង្រឹងសុវត្ថិភាពស្បៀងជាសកល និងការស្វះស្វែងរកការគាំទ្រគម្រោងពង្រឹង ការផលិតផលកសិកម្មប្រកបដោយសុវត្ថិភាពស្របតាមស្តង់ដាអឺរ៉ុប។ ខណៈល្ងាចនេះលោកកំពុងតែធ្វើដំណើរត្រឡប់មកកម្ពុជាវិញ។

ភ្លាមៗនេះមិនបានប៉ុន្មាននាទីផង នាយករដ្ឋមន្ត្រីកម្ពុជាក៏បានចាត់តាំងលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជារដ្ឋមន្ត្រីស្តីទីនៃក្រសួងកសិកម្ម រុក្ខាប្រមាញ់ និងនេសាទ បន្ថែមលើមុខងារបច្ចុប្បន្ន រហូតដល់មានការតែងតាំងជាផ្លូវការនូវរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

បើតាមសេចក្តីសម្រេចរបស់រាជរដ្ឋាភិបាល សម្តេចតេជោ បានផ្តល់សិទ្ធិដល់រដ្ឋមន្ត្រីស្តីទីនៃក្រសួងកសិកម្ម រុក្ខាប្រមាញ់ និងនេសាទ ដែលទទួលបានការចាត់តាំងប្រើប្រាស់សិទ្ធិអំណាចទាំងអស់ស្របតាមច្បាប់ និងលិខិតបទដ្ឋានគតិយុត្តជាធរមាន ដើម្បីដឹកនាំ និងគ្រប់គ្រងការងាររបស់ក្រសួង អង្គភាពចំណុះរបស់ក្រសួង ព្រមទាំងមន្ត្រីរាជការ និងបុគ្គលិកដែលជាភ្នាក់ងាររដ្ឋបាលនៅក្រោមឱវាទរបស់ខ្លួន៕